Os lobos mataron o martes doce ovellas, dúas femias e dez cordeiros, en Outeiro de Rei. O ataque rexistrouse a plena luz do día na parroquia de Arcos.
A granxa afectada é a SAT Torre de Arcos, que rexenta Armando García Reigosa. Este gandeiro viu o martes, ás 10 e media da mañá, a dous lobos medianos roldando pola súa propiedade. Os animais estaban lonxe, pero non se asustaron ante a súa presenza, marchándose lentamente.
García Reigosa resaltou que catro mastíns vixían a súa instalación, pero isto non impediu que os lobos fixesen un buraco para entrar na granxa ou que saltaran o aramado de 1,20 metros de alto.
SAT Torre de Arcos atópase a só tres quilómetros do centro urbano de Castro Ribeiras de Lea, aínda que territorialmente está integrada no concello de Outeiro de Rei. Ademais, a parroquia á que pertence a instalación non está deshabitada. Todo isto proba que a proximidade da xente non funcionou como elemento disuasorio dos lobos. «Estou ao pé do polígono industrial de Castro. Isto non é a montaña nin o Terceiro Mundo!», queixouse García Reigosa. «Os lobos xa son case domésticos!», subliñou.
García Reigosa calcula que os técnicos de Medio Ambiente pagaranlle polas perdas «100 euros tirando para abaixo». O propietario da instalación cre que esa compensación «é moi pequena» e considera «ridículo» que se non aparecen restos da res, un afectado non recibe retribución. «Como non hai cadáver, non hai delito», ironizou.
O rexente da granxa afectada apuntou tamén que os ataques dos lobos poñen «moi nerviosas» ás ovellas, alterándolles con frecuencia o proceso do embarazo.
O rexente de SAT Torre de Arcos é crítico coa actuación de Medio Ambiente na forma de protexer ao lobo. «Botaron lobos para que comera ao xabaril, pero a este non conseguen entrarlle, así que atacan ás vítimas máis vulnerables, as reses domésticas. Se Medio Ambiente alimentase aos lobos nun sitio determinado e controlase a poboación deses animais, non pasarían estas cousas», explicou.
OUTROS ATAQUES. A incursión do martes súmase a outra moi recente, acontecida na mesma granxa a finais de xuño. Daquela, os lobos mataron tres ovellas e deixaron cinco malferidas, que García Reigosa viuse obrigado a sacrificar.
O ataque do martes é o cuarto que se rexistra en Outeiro de Rei no que vai de ano.
O rexente da granxa calcula que Medio Ambiente pagaralle polas perdas «100 euros tirando para abaixo, unha cifra ridícula»
