Os afeccionados ao fútbol de Mondoñedo xa contan as horas para reencontrarse cos heroes daquel equipo que levou ao Mindoniense ás cotas máis altas da súa historia e que certificou o ascenso na temporada 1990/1991 a Terceira. Aproveitando as vodas de prata desta efeméride, o plantel e directiva daquela época recibirán mañá unha calorosa homenaxe da localidade.
O encargado de levar adiante esta iniciativa foi o concelleiro de Deportes da cidade episcopal, Manolo Tapia. «A idea é volver xuntar un grupo de xente que ao mellor leva moito tempo sen verse e rememorar aqueles tempos tan bos», destaca.
Os que se acheguen mañá ao Viñas da Veiga poderán ver a históricos do fútbol local e mariñano como Noly -capitán e autor do gol de falta diante do Calo que rubricou o ascenso do Mindoniense-, Moncho, Nacho ou Cándido, entre outros. E no banco estará Gayol, que guiou a ese conxunto a un ascenso co que practicamente nin eles mesmos contaban cando arrincaba aquela tempada.
A primeira parada da homenaxe será o consistorio, onde as autoridades locais, coa alcaldesa Elena Candia á cabeza, ofrecerán unha recepción oficial aos xogadores e directivos daquel equipo a partir das catro da tarde.
CONFIRMADOS. Tras este recibimento, ao que esperan que tamén se sume o presidente da Federación Galega de Fútbol, Rafael Louzán, dirixiranse ao estadio Viñas da Veiga, onde ás 18.00 horas arrincará o partido entre os veteranos do Viveiro e unha plantilla integrada polos xogadores daquel equipo do Mindoniense e outros que competiron nos anos seguintes en Terceira.
«Do equipo do ascenso xa temos confirmada a presenza para xogar de Cándido, Nacho, Xesta, Ángel, Noly, Moncho, Juan Muíña, Chino e Juan de Palas. Tamén estarán, pero non xogarán, Guillermo, Seijas, Molo, Carlitos e Manolito. E se o traballo llelo permite, tamén virán Kike e Alberto Bermúdez. Pibe vive en Vigo e ao final cremos que non poderá asistir polo traballo. Completarán o equipo xogadores de toda a época de Terceira: Bouso, Devesa, Bebo, Sandamil, Picoaga, Alberto García, Durán, Negrín, Raúl e Lemos. E o encargado de dirixir ao equipo será Jesús Gayol», avanza Tapia.