Hai cestas grandes e pequenas, con varios pisos ou con distintas formas, e logo está a que sortea a comisión de festas de Castro de Rei polo Entroido, que é, literalmente, unha carretilla. José Luis Castro Tellado e Abelardo Fernández son os ramistas que idearon esta orixinal proposta, pensada para diferenciarse do resto dos sorteos que se celebran nestas datas e presentada oficialmente en sociedade este domingo na feira de Castro de Rei.
Un par de butelos, chourizos, unha cachola, un lacón, garavanzos, patacas, nabizas e dúas botellas de viño, xunto á citada carretilla, compoñen esta particular cesta, valorada nuns 100 euros e que conta con todos os ingredientes necesarios para preparar un bo cocido. Quen queira facerse con este suculento botín, e co vehículo de propina, só ten que probar sorte mercando, polo menos, unha das rifas postas á venda pola comisión de festas, a un prezo único de 2,5 euros e que se poden adquirir na feira ou nos distintos establecementos comerciais da localidade.
As patronais de San Xoán serán no campo da feira o segundo fin de semana de xullo, cunha churrascada gratuíta o venres
O agraciado coñecerase o vindeiro 5 de marzo, no sorteo que se celebrará en directo na feira dominical. A primeira papeleta extraerase ás 13.00 horas e, de non aparecer a rifa premiada, seguirase sorteando ata que toque. Só se poderá obter a carretilla de Entroido se se presenta a gañadora nese momento na feira.
Aínda que esta é sen dúbida a proposta máis chamativa, non é a única dos ramistas para recadar fondos, xa que tamén fixeron lotaría de Nadal e de Reis e contan con deseñar camisetas. Ao recadado por esta vía sumarán o que obteñan do campo, a axuda do Concello de Castro de Rei e as cotas de veciños e negocios e outras posibles colaboracións para acadar un orzamento duns 16.000 euros.
A festa de San Xoán, como é costume, celebrarase o segundo fin de semana de xullo (días 8 e 9). José Luis e Abelardo están barallando opcións para definir un programa no que contan con ter unha churrascada gratuíta o venres á noite -tense feito outros anos, pero non promovida pola comisión-, misa os dous días -o domingo no propio campo da feira-, animación polo día e varias orquestras.