César Fernández Fernández, Otilio Fernández García, Antonio Fernández Enríquez, Manuel Fernández Díaz, Modesto Arias López, Constantino Fernández Castelao, Antonio Arias Álvarez e Emilio Pérez Álvarez. Son músicos da Fonsagrada, mestres da tradición. Levan toda a vida percorrendo palcos e corredoiras e xa é difícil sorprendelos con aplausos, pero este domingo recibiron unha ovación que os encheu de orgullo, a dos seus veciños, que quixeron agradecerlles o esforzo que levan feito para coidar, conservar e transmitir a música tradicional da montaña luguesa.
Estes oito homes recibiron o Butelo de Ouro, distinción que outorga o Concello da Fonsagrada a quen destaca polo seu labor en beneficio do municipio. Méritos non lles faltan. O condutor do acto, José María Álvarez Vilabrille, resumiuno con claridade: "A historia dun pobo non se entende sen a súa música" e estes oito intérpretes, xunto con outros que xa non están, ocupáronse de "manter o legado" e de transmitilo nas mellores condicións ás novas xeracións, para que a sonoridade propia da montaña teña o eco que precisa.
E este domingo A Fonsagrada foi unha caixa de resonancia. Os mestres non tocaron, deixáronse agasallar e escoitaron con respecto as novas xeracións de músicos, que quixeron deleitalos e agradecer o aprendido. Emilio do Pando falou en nome dos oito para agradecer o Butelo de Ouro e para garantir que mentres teñan folgos a gaita soará na Fonsagrada. "Levamos a tradición desde o berce e segue cada vez máis forte e sonora", sentenciou.
A feira do butelo rexistrou un novo éxito de público, con vendas importantes e cheo nos comedores dos restaurantes da vila
O alcalde, Argelio Fernández Queipo, explicou que a distinción para estes músicos foi acordada por unanimidade de toda a corporación, a proposta da concelleira Josefa Ortiz de Galisteo, e valorou a "unanimidade de pensamento" á hora de premiar o traballo que os músicos tradicionais levan feito.
Lamentou que xa non estean outros que tamén merecían a distinción, como Xusto de Rego, Horacio de Xestoso, Rubio de Xan, Ramón Chocolateiro, Casopo e Marentes de Santa Xuliana ou Sergio da Veiga. Deste último, o alcalde da Fonsagrada garda un recordo especial, pois confesou que lle axudou "a bailar e a cortexar". Lembrou cando Sergio da Veiga coa súa gaita e Ovidio de Pereira ao tambor amenizaban as festas e sempre buscaban o momento para compracer os namorados coa súa peculiar dedicatoria do tema En las cositas del querer nadie se debe meter.
Este domingo foi tempo de escoitar as novas xeracións. O quinteto Illa Pancha, con tres gaiteiros da Fonsagrada ao frente, e o grupo Antaruxas e Sorteiros deixaron claro que a herdanza dos mestres está en boas mans.
E mentres os fonsagradinos honraban os gardiáns da tradición, ás portas do concello continuaba a feira do butelo. Os postos estiveron ateigados durante toda a fin de semana e os mostradores das cárnicas tiveron especial aceptación, cun notable nivel de vendas. O resto de produtos de alimentación e artesanía tampouco desmereceron e a cita pechou con satisfacción xeral entre os vendedores. Tamén os restauradores tiveron que pendurar o cartel de completo nos comedores.
