Mañá xoves da comezo unha nova edición do xa tradicional concurso de tapas de Meira, que converterá a vila, durante un total de catro xornadas, nun recuncho gastronómico ideal.
Durante todos estes días, os clientes que decidan degustar as propostas pensadas e preparadas para a ocasión, poderán facelo a partir das 20.00 horas, a un prezo único de dous euros.
Este ano, o concurso acada unha cifra récord de participantes, chegando á ducia, e amosando que este tipo de iniciativas continúan a ser un acerto en todos aqueles municipios nos que se leva a cabo, xa que anima á xente a saír da casa e serve tamén para dinamizar o sector hostaleiro de cada concello.
O sistema de votación será idéntico ao da edición pasada. Así, os clientes deberán seleccionar as tres mellores tapas, concedéndolles tres, dous e un punto. Para poder efectuar esta asignación, deberán probar as racións dun mínimo de seis establecementos.
Os que se decanten por degustar as doce propostas que concorren a este certame gastronómico de Meira, optarán ademais aos premios que conceden o Concello e os hostaleiros da vila.
Así, haberá un primeiro premio de 300 euros que será canxeable nun vale de compra para gastar nos negocios meiregos; un segundo de 210, con idénticas características, e un terceiro de 90, tamén para adquirir algunha compra na vila.
Este será un dos alicientes dun certame no que haberá tapas para todos os gustos. Carne, peixe e marisco con salsas de todo tipo serán as propostas que poñan na barra os negocios participantes, que esperan acadar o mesmo éxito de edición pasadas.
De feito, as tres tapas que obteñan o maior número de votos por parte do público recibirán un diploma acreditativo, tal e como xa aconteceu en edicións pasadas.
OFERTA. As propostas deste sexto concurso, organizado polo Concello de Meira e os hosteleiros, coa colaboración da Asociación Provincial de Hosteleros de Lugo, son: Delicias do río, de Arguiñano; Tapa Cazoleiro, de Cazoleiro; Dous sabores, do Chispas; Rodaja de merluza, da Flor; Fastfood, do Muíño; Marburguer, do Pedreira: Secreto ibérico, do Pozo; Vieiras con crema de queixo, do Recuncho; Mar e terra, da Nova Pizza; Carrilleras en salsa de chocolate, do Centro; Cachopín, do Xeira; e Specífico Romano, do Catalán.
