O BNG denuncia un "veto de facto á lingua galega" en RTVE

A deputada do BNG no Parlamento de Galicia Olalla Rodil denunciou este venres un "veto de facto á lingua galega" nos informativos da Corporación RTVE e instou ao "mantemento da pluralidade lingüística".

Na comisión Institucional e de Administración Xeral, Xustiza e Interior da Cámara autonómica, censurou que o "persoal (de RTVE) recibe indicacións de recoller declaracións en galego e castelán".

Con todo, apuntou que o seu Manual de Estilo contempla "garantir o subtitulado de intervencións".

A parlamentaria reivindicou a "garantía dos dereitos lingüísticos dos galegos" e fíxose eco dunha queixa do sindicato CXT a este respecto.

Rodil tamén afeou que os informativos territoriais "fóronse castelanizando" e que nun deles chegáronse a ofrecer "trece totais" ou intervencións de cidadáns ou políticos "en español".

"No que vai de 2017, a información meteorolóxica envíase directamente de Madrid; antes o presentador era galego e transmitíase na lingua propia", dixo.

Ao seu xuízo, "hai maneiras de garantir" que siga divulgándose en galego, xa sexa a través dunha 'voz en off' ou do "estupendo servizo meteorolóxico que hai en Galicia".

A representante do BNG subliñou que dirixentes políticos galegos, citando ao presidente da Xunta, Alberto Núñez Feijóo, entre eles, responden os medios de comunicación en castelán "por vontade propia", algo que "non sucede así con persoas anónimas".

En paralelo, criticou que a produción de cinema e series en lingua galega, tras un "drástico recorte de fondos", reciba 500.000 euros por parte de RTVE.

PSdeG-PSOE e En Marea apoiaron a proposición non de lei do BNG neste ámbito, a diferenza do PP.

O socialista Juan Díaz Villoslada asegurou que existe "falta de pluralidade" e avogou por reforzar a "cooficialidade lingüística" e o "recoñecemento e amparo da pluralidade" a nivel estatal.

Paula Vázquez Verao, de En Marea, alertou dunha "tendencia a que perige a desconexión territorial, algún fallo técnico impide que se vexa en todas as plataformas; é unha tendencia xeral a eliminar a pluralidade cultural do Estado".

Por contra, Raquel Arias, do PP, grupo que detenta a maioría absoluta no Hórreo, asegurou que a Xunta "non pode inmiscirse en competencias que lle corresponden ao Estado".

"Non podemos empregar este foro para traer competencias doutras administracións a propósito de que non é competencia deste foro", declarou.

Igualmente, subliñou que o feito de abordar este asunto débese "unicamente a cuestións partidistas" porque "non o poden facer en Madrid", en alusión ao BNG, sen representación en Cortes.