Un empregado da empresa Bloques Cando -con sede en Castro de Ribeiras do Lea- resultou ferido esta mañá ao caer dunha altura duns tres metros no lugar de Ventín, na parroquia de Silva -que pertence ao municipio lucense de Pol-.

Segundo fontes consultadas por AGN, o ferido é un traballador de 43 anos de idade, que responde ás iniciais G.F.V, empregado da citada empresa de materiais de construción . O sinistro produciuse sobre as once e vinte da mañá, cando por causas que aínda se descoñecen o operario precipitouse ao chan na obra na que traballaba.

Ata o lugar do accidente desprazouse unha ambulancia asitencial do 061, que evacuou ao ferido ao Hospital Xeral de Lugo. Segundo as primeiras informacións, o traballador estaba consciente e queixábase dunha forte dor nas costas. En principio, a falta dunha valoración médica, o seu estado non parecía grave.