O Centro Comercial Urbano (CCU) de Monforte conseguiu encher na tarde de onte a discoteca Idea da cidade do Cabe co fin de recoller alimentos para os máis desfavorecidos. Fíxoo cun desfile de moda no que o prezo da entrada fixouse nun quilogramo de comida non perecedoira.

O resultado, segundo a presidenta da asociación, María José Senra, foi «espectacular», pois lograron convocar a unhas 600 persoas no local e recoller ao redor de dúas toneladas de alimentos, pois a maioría do público achegouse con algo máis dun quilo de comida para ver o pase de moda.

A xente que encheu a discoteca, cedida gratuitamente para o evento polos seus propietarios, depositou azucre, legumes, latas de conservas de todo tipo, aceite e cereais, entre outros produtos.