Lugo foi a provincia galega con menos proxectos presentados o pasado ano ao plan Emega da Xunta, destinado a fomentar as iniciativas empresariais dirixidas por mulleres. En concreto, só houbo tres proxectos lucenses dun total de 83, concentrados a maioría nas provincias de Pontevedra, con 38, e A Coruña, con 29, mentres que en Ourense houbo doce.

A secretaria xeral de Igualdade, Susana López Abella, manifestou onte en Lugo a preocupación do Goberno galego pola notable diferenza entre a participación de mulleres emprendedoras lucenses e das outras provincias, situación que atribuíu «non á falta de iniciativas, senón á posibilidade de que o ano pasado a divulgación dás axudas do plan Emega tivese problemas».

Para evitar que se repita esta situación, López Abella, acompañada pola delegada territorial da Xunta, Raquel Arias, reuniuse onte en Lugo con representantes das distintas asociacións de mulleres empresarias da provincia para explicarlles como funciona este programa para fomentar as iniciativas femininas.

Segundo explicou posteriormente, en rolda de prensa, a secretaria xeral, este ano o plan Emega dispón dun orzamento de 665.000 euros e introducíronse unha serie de novidades, «produto da adaptación deste plan ás novas circunstancias socioeconómicas», sinalou.