Unha muller de 46 anos e natural de Lugo, M.I.V.N., enfróntase a unha pena de nove anos e seis meses de prisión por intentar asasinar cun coitelo de cociña á compañeira sentimental da súa exparella ante a sospeita de que querían quitarlle a custodia da filla menor de idade que ambos teñen en común. Fíxoo, supostamente, desde o asento traseiro do vehículo no que se atopaban os tres.

No xuízo, a muller declarou que se meteu no coche cando a parella saía do centro de acollida onde estaba a pequena. Engadiu que só pretendía asustalos e que a vítima recibiu catro coiteladas «porque se moveu». Onte, cando a defensa expuña as súas conclusións, o presidente do Tribunal advertiu que M.I.V.N. estaba a sufrir un desmaio, polo que tivo que ser evacuada nunha ambulancia non medicalizada ata un centro sanitario.