IAGO EIREOS ten un paraugas vermello na súa furgoneta. É o único elemento de cor que se pode atopar dentro e tamén o único carente de función nese vehículo. Como todos os grandes fotógrafos, o lucense decidiu facer a súa viaxe iniciática. Vaina acometer no seu senso máis literal: remontando a historia da fotografía ata as súas orixes, que se atopan na cámara esteanoscópica.

O creador lucense usa esta técnica de cámara escura cun burato para que entre unha liña de luz e que non precisa de lentes, variando só as dimensións do aparello. A caixa que usaban os primeiros artistas da imaxe multiplícase para ser a traseira dunha furgoneta.

O artefacto funciona colocando un obturador na parede metálica que separa a cabina da carga. O feixe de luz proxéctase nun papel de gravado estendido contra as portas traseiras. Iso implica que o fotógrafo estará dentro da propia cámara, activando o dispositivo.