A asociación cultural Xermolos e a Irmandade Manuel María veñen de publicar a obra ‘Tebras’, un poemario de carácter autobiográfico que supón o debut literario do polifacético artista chairego Anxo Lamas.

O escultor e pintor de Bazar, agora tamén escritor, recolle nesta publicación un total de 60 poemas, ilustrados con candaseu debuxo, nos que reflicte diversos aspectos da súa vida. «O título ‘Tebras’ fai referencia a que a miña vida non foi un camiño de rosas», explica Lamas, quen quedou orfo de pequeno e tivo que facerlle fronte á enfermidade en máis dunha ocasión.

O libro, prologado polo mestre e escritor da Ponte de Outeiro Xosé Otero Canto, comeza cun soneto dedicado ás vacas, un animal ó que Anxo Lamas lle ten «un cariño inmenso, porque eramos cinco irmáns e saímos adiante grazas ó leite de dúas vacas que tiñamos» e remata cun dos textos máis significativos para el, o soneto ‘Dixéronme, naiciña’, dedicado á súa nai.