POR FIN chegou o día de honrar ao acordeón. Ao redor de setenta persoas xuntáronse onte en Navia de Suarna no primeiro Xantar do Alcordeón que este ano homenaxeou a Justo Suárez Coea.

Coea é un acordeonista moi aprezado na Montaña de Lugo porque ten tocado infinidade de veces en case todos os lugares de Navia de Suarna, A Fonsagrada, Cervantes... Moitas vodas, bautizos, comuñóns, festas e bailes teñen vibrado con Coea, razón pola que merece unha homenaxe de corazón.

O Xantar do Alcordeón quere ser a primeira de moitas citas nas que se evidencie o arraigo tan grande que ten o instrumento na zona. Con especial relevancia no lugar anfitrión, Navia de Suarna.