O artista lucense Santiago Caneda exporá a súa obra a partir deste venres 14 de novembro por primeira vez en Santiago de Compostela e farao a través dunha nova colección composta por 16 debuxos e pinturas, próximos á estética cubista e á abstracción, que se poderá ver na galería Galyarte. 

A inauguración terá lugar ás 20.30 horas coa presenza do propio autor, en cuxos debuxos e cadros a percepción espacial está condicionada polos límites que marca a liña, que tanto perfila as figuras como as zonas de cor, ou se utiliza como recurso caligráfico para sombrear algunhas áreas e describir elementos.

O espectador poderá gozar de espazos inventados, irreais, de escenarios nocturnos, fantásticos, cheos de imaxinación. A súa obra traslada en certa medida á estética cubista aínda que moito máis suavizada tanto nas súas formas como no seu colorido. Tamén se achega á abstracción, como el propio autor declarou nalgunha ocasión.

A obra de Santiago Caneda (San Clodio, Lugo, 1946), tras unha longa traxectoria de corenta anos, pódese admirar en distintos museos e entidades públicas e privadas de España, Arxentina, Costa Rica, EE.UU e Bélxica. A exposición estará aberta ata o día 5 de decembro en horario de 18.00 a 21.00 horas.