O Consorcio Galego de Igualdade e Benestar inaugurará en datas próximas unha oficina en Baralla que dará servizo a 18 municipios da provincia de Lugo. Este centro, coñecido como oficina I+B, aglutinará as xestións relacionadas cos plans de integración social, apoio á familia, infancia, adolescencia e igualdade, entre outros, segundo recolle El Progreso na súa edición impresa deste luns.

Na oficina I+B de Baralla haberá, en principio, catro persoas, que traballarán a prol da dinamización da igualdade de xénero, a inclusión social e laboral dos colectivos desfavorecidos e a educación familiar. Está previsto que o número de traballadores se duplique a medida que se vaian incorporando novos servizos.

O Consorcio Galego de Igualdade e Benestar, dependente da Vicepresidencia da Xunta, pretende con estas instalacións descentralizar os servizos de carácter social, para achegalos á poboación rural e amplificar os seus beneficios.

O voceiro do BNG en Baralla, Xosé Manuel Becerra, colaborou activamente co Consorcio na busca do local e a posta en marcha da oficina de I+B. Afirma que "é unha aposta pola xestión pública e polo rural, un intento de achegar servizos ás vilas para gañar benestar e frear o despoboamento".

Becerra explica que na oficina de I+B traballará persoal especializado en servizos sociais que poñerán en marcha actuacións de inserción sociolaboral, dinamización social e apoio familiar. Trátase de sociólogos, psicólogos ou asistentes sociais que traballarán para mellorar as condicións de vida nas zonas rurais, en especial para os colectivos máis desfavorecidos e aqueles que precisan atención especial, como os nenos, adolescentes e persoas maiores.

Utilidade
A oficina de I+B ocupará unha casa rehabilitada en pleno centro da vila de Baralla. Nela poderán realizarse trámites administrativos relacionados coas áreas dependentes do Consorcio Galego de Igualdade e Benestar. O seu persoal, ademais, traballará en contacto directo coa xente para atender as necesidades que se presenten.

Dará servizo a Baralla, Becerreá, Navia de Suarna, Pedrafita, Cervantes, As Nogais, A Fonsagrada, Baleira, Negueira de Muñiz, Ribeira de Piquín, Meira, Castroverde, O Corgo, Portomarín, Guntín, Láncara, O Páramo e Triacastela.

39.665 son as persoas que se beneficiarán dos servizos da oficina.