O Museo Provincial de Lugo podería perder algunhas das súas pezas máis importantes, segundo unha sentenza do xulgado de primeira instancia número dous da cidade, que establece a devolución do legado de Álvaro Gil Varela aos herdeiros deste artista.

Segundo informou este mércores a Vicepresidencia da Deputación, este ente vai recorrer o fallo emitido pola xuíza Ángela Galván Gallegos, no que se estima integramente a demanda interposta polos sucesores de Álvaro Gil. Os herdeiros reclamábanlle á Deputación as pezas que Gil e a súa esposa foron depositando no Museo de Lugo, entre as que figuran elementos tan sobranceiros como o torques de Burela ou o carneiro alado de Ribadeo. A Deputación tería que entregar aos sucesores todo este legado, que constitúe unha porción importante do patrimonio que alberga o Museo Provincial.

Entre os anos 1955 e 1980, Álvaro Gil Varela e a súa dona, Antonia Arias, depositaron no museo provincial numerosas obras pictóricas e pezas de incalculable valor. Entre as achegas destaca unha importante colección de pezas de ourivería, na que figuran, ademais do torques e o carneiro ribadense, brazaletes, arracadas, e pulseiras. Outros dos depósitos do Museo de Lugo afectados polo fallo xudicial son varias obras pictóricas de Corredoira e unha colección de pintores cataláns.

No ano 2000 é cando os agora demandantes reclaman á Deputación as pezas obxecto do fallo xudicial.

O ente provincial anunciou este mércores que vai recorrer esta sentenza, entendendo que é obriga da institución velar por que este importante legado permaneza exposto na cidade de Lugo, para goce dos cidadáns, tal e como foi vontade de Gil Varela cando elixiu ao Museo Provincial para albergar estas pezas e obras.

O vicepresidente, Antón Bao, manifestou que dende a Deputación están abertas as liñas de dialogo coa familia para que, independentemente dos resultados do contencioso xudicial, se poida chegar a un acordo para que as pezas permanezan, nun futuro, “onde Álvaro Gil tivo a intención de expoñelas”.

Bao tamén manifestou, en declaracións a AGN, que a sentenza é unha consecuencia da "nefasta xestión" que fixo o PP do asunto. Ao seu xuízo, esta situación, que pode mermar considerablemente o catálogo do Museo Provincial, é unha "herdanza directa do Goberno de Francisco Cacharro Pardo", porque en vez de buscar unha solución negociada, "mantivo en todo momento un enfrontamento directo coa familia de Álvaro Gil".