"Despois da miña muller e os meus fillos, a música é o máis importante da miña vida, é o mellor que hai". Así de contundente, e sen dubidar nin un intre, se amosa Pepe da Silva, o caixeiro da charanga Os Ponteses, para explicar o que sente polas notas e os ritmos. A música —á que se aproximou xa de maior, ó redor dos 40 anos, "porque de novo tocaron tempos moi malos e collín a guerra toda"— acompañouno dende aquela case sen descanso.

Por eso, os gaiteiros das Pontes, que cada ano dende hai seis organizan unha Repichoca dedicada a alguén da localidade, renderanlle unha homenaxe o 26 de abril no local do pulpo da Fraga. "Levamos un seguemento da música de gaita nas Pontes e sobre todo dos músicos maiores, porque hai que facerlle unha homenaxe a quen realmente ten que levala", explican os organizadores, que prevén que asistan ó redor de 90 persoas, como nas anteriores edicións.

Da Silva, tamén coñecido coma O Portugués, porque seu pai era nativo do país luso, fixo o primeiro achegamento á música por casualidade nunha noite de San Xoán. "Estaban tocando uns cantos, a min a música sempre me gustou, e collín o bombo para acompañalos", explica. "E non saíu tan mal, dixéronme que o levaba ben", engade entre risas, mentres explica que así, e para "botarlles unha man", foise "liando" sen que lle ensinase ninguén.

"Aprendín só, a conta dos compañeiros", comenta, mentres subliña que toca con ritmo, pero sen saber música. Ademais, dálle a todo. Tocou a gaita, o bombo ou incluso a tuba no servizo militar. Agora, e dende hai tempo, é o caixeiro de Os Ponteses.

Como formación, comezou sendo un cuarteto de gaitas, dos que hoxe xa non queda ninguén, aparte del. No 1985 empezaron coma Os Ponteses, a única charanga que continúa viva nas Pontes, aínda que as caras dos compoñentes foron variando co paso dos anos.

"Cotizabamos ben e iamos tocar a moitos sitios. Durante os primeiros anos tivemos días de ir a dúas festas", recorda Da Silva, que bromea dicindo: "Mira cómo o facíamos que a xente preguntaba por nós". Porén, ten claro que "foiche malo de aguantar, porque era difícil manter o grupo".

Agora, recoñece, "a cousa anda achicada" e, pese a que tocar é moito máis fácil porque, di, "sabes máis", hai moitas máis formacións. Hoxe el, xunto con Bolaño (tenor), Celso (bombo), Celso (saxo alto), María (trombón), Rodrigo e Aurelio (saxo), Cipriano (trompeta) e algún rapaz máis da banda municipal que colabora ás veces son os que manteñen vivos os sons da charanga Os Ponteses.