Os coruñeses Borja Yribarren e Ignacio Otero adxudicáronse este martes o II Torneo Día da Constitucion Trofeo Ibercaja, primeira proba puntuable para o ranking da Federación Galega de Pádel disputada desde o pasado venres nas instalacións do Club Pádel Hotel Santiago.

A vitoria dos herculinos, obtida tras unha durísima final que lles enfrontou á parella formada por Fernando Aldao e Sebastian Lafon con resultado final de 6-4 e 7-6, sérvelles para recuperar a cabeza do ranking galego.

Na categoría feminina, a parella fomada por Carmen León e a lucense Vanessa Alonso, que este ano disputaron o circuíto profesional, impuxeron a súa superioridade absoluta gañando na final ás ata onte número 1 do ranking galego, a coruñesas Marta Muñoz e Carolina Martínez, por un contundente 6-1 e 6-2. Como dato da súa superioridade, só perderon 5 xogos en todo o torneo.

Do resto da participación lucense destacar a Pilar Delgado e Liliana Ross que alcanzaron os cuartos de final.

O lucense Miguel Veiga, que formou parella con Fernando Clavario, caeu en semifinais ante os que serían ao cabo campións Yribarren e Otero por un tenteador de 7-6 e 6-2. Este resultado pódese catalogar como excelente xa que á cita disputada no Club Pádel Hotel Santiago acudiron os 16 mellores xogadores de Galicia. O outro representante lucense, Santiago Mota, e o seu compañeiro Diego Castellini, obtiveron o mesmo resultado que o seu paisano, alcanzando as semifinais tras un brillante torneo. Cabe destacar a súa vitoria en oitavos de final ante os irmáns ferroláns Mateo e José García dos Reyes, no que para moitos foi considerado como o mellor choque do torneo.

A organización considera esta experiencia pioneira en Lugo como un rotundo éxito e espera darlle continuidade ao longo dos anos nas instalacións lucenses.