A Coordinadora para a protección da fauna salvaxe criticou este sábado a celebración, o vindeiro día 30, do campionato de España de caza de raposo, que terá lugar en Portomarín, e que estivo precedido este sábado polo campionato galego, celebrado na Cañiza. A entidade prepara unha concentración na vila luguesa para ese día.

O grupo conservacionista salienta que "este tipo de actividades son unha maneira de diversión para un grupo de persoas que gozan matando animais, e que en ningún momento preservan a nosa biodiversidade, nin coidan da nosa fauna".

A entidade considera que, "como vén de promulgar o Tribunal de Dereitos Humanos de Estrasburgo, a caza non é un dereito humano", e "polo tanto deben prevalecer os dereitos que teñen  os raposos, como seres vivos,  e que nós  estamos obrigados a defender".

A coordinadora convida a participar na concentración do día 30 en Portomarín, "para así demostrar a nosa repulsa ante o asasinato de animais inocentes, que serán mostrados como trofeos diante de xente que non respecta os dereitos máis fundamentais de todo ser vivo".

Outra das preocupacións deste grupo é o abandono "crecente" de cans de caza un ano máis, unha vez rematada a temporada  2009-2010. Por iso, a coordinadora solicítalle á Xunta de Galicia que elabore "dunha vez" un censo dos cans que posúe cada cazador, e que controle o seu número tanto ao inicio como ao remate da temporada de caza.