Manuel gonzález capón xa é alcalde de profesión. Di que ós seus 58 anos non podería volver ó seu posto anterior de banqueiro porque tras dúas décadas á fronte do Concello xa perdeu a práctica. Agora leva outras finanzas, as públicas, e afirma que hai que administrar con tino para optimizar recursos en tempos de crise.

Que lle queda por facer no ano e pico que falta ata as eleccións?
Hai que ir rematando os proxectos que xa están encamiñados, como a residencia de maiores ou o punto de atención á infancia.

Cando estará lista a residencia?
As obras rematarán este ano e espero que estea inaugurada, como moi tarde, a principios do 2011. É unha obra moi importante porque xerará emprego para 40 persoas e a Fundación San Rosendo comprometeuse a que sexan desta zona.

E o punto de atención á infancia?
A Xunta xa concedeu unha subvención de 250.000 euros para facelo. Estará na antiga casa do médico e a intención é que empece a funcionar neste mesmo mandato. Nos últimos tempos houbo un repunte na natalidade en Baralla e temos que dar servizos canto antes.

A área fluvial parece un proxecto eterno.
Estivemos 15 anos para conseguir uns terreos céntricos, é moito tempo e deunos moitos problemas, pero agora xa estamos rematando. As obras das piscinas xa empezaron e estarán listas para o verán do ano que vén. Agora estase traballando na construción do edificio onde irán os vestiarios, aseos e taquillas, e despois faranse os dous vasos.

Que lle gustaría facer e non lle vai dar tempo antes das eleccións?
Non me propoño imposibles porque o tempo é o que é. Teríame gustado que Suplusa tivese aceptado o proxecto que presentamos para facer o polígono industrial, pero o goberno da Deputación non ten sensibilidade nestes temas. Esperemos que no próximo mandato o PP recupere o goberno provincial e o polígono saia adiante.

Ten moitas esperanzas postas no cambio de goberno?
Claro que si. Dende que cambiou o da Xunta fixéronse moitas cousas. Por exemplo, xa temos o compromiso de que se vai amañar o acceso de Baralla á A-6, na LU-710, que
une Baralla e Baleira. O anterior Goberno excluíra este enlace de catro quilómetros do proxecto de acondicionamento. Agora teño o compromiso do conselleiro Agustín Hernández de que se fará a obra. A nova Xunta tamén decidiu pechar a oficina de Igualdade e Benestar. Esa oficina creouna a Vicepresidencia do Goberno bipartito, pero non ten contido, non fai nada. Ou se lle dá un xiro ó tema ou non serve para nada. Non se pode pechar sen máis porque está subvencionada con fondos europeos, pero é cuestión de meses.

Cal foi a súa maior satisfacción nos anos que leva de alcalde?
Foron moitas. Cada día empezas con ilusión. Puiden ver un cambio total no municipio, o cal é lóxico porque pasaron 20 anos.

E o seu maior desgusto?
O momento das expropiacións para facer obras. Sempre son conflitivas. Por exemplo, tiven moitos problemas para ampliar as rúas da Serra e Fabeiro. Hoxe os veciños entenden que era necesario, pero no momento houbo moito enfrontamento.

De que se pode vivir en Baralla?
Traballando, como en todas partes. O 60 por cento da poboación vive da agricultura e a gandaría. Somos o municipio dos Ancares con máis cabezas de gando. Tamén hai dúas canteiras, un aserradoiro e bastante xente empregada no sector servizos.

Cómo vendería Baralla a alguén de fóra?
É un lugar agradable para vivir. Estamos ben comunicados coa autovía A-6, temos un entorno moi bonito, con río e montaña, e moi bo clima.

O do microclima é un conto que cada un di do seu lugar.
Non, o de Baralla é certo. Aquí temos sol cando os concellos do arredor están cubertos de néboa. É un val moi resgardado.

Ten algún proxecto de promoción turística?
Intentamos, pero a iniciativa ten que ser privada. Por exemplo, abriuse hai pouco unha casa de turismo rural. Nós queremos promocionar os encantos naturais e se veñen visitantes tamén aumentarán os negocios.

MOI PERSOAL
Vostede en qué traballaba antes de ser alcalde?
Era o director da oficina do Banco Gallego de Baralla. Antes estivera nunha de Lugo.

A que dedica o tempo libre?
Antes ía á caza menor e pode que agora volva. Tamén gozo moito xogando ás cartas cos amigos. Hai un nivel alto.

Que libro está lendo?
Leo pouco. Fágoo sobre todo en internet, normalmente prensa. Tampouco vou ó cine, hoxe en día estamos saturados pola televisión.

Que música lle gusta?
Toda a que non sexa excesivamente moderna. Poño a radio no coche e escoito o que saia, se é variada entretenme máis.

Cociña?
Teño boa cociñeira e non quero meterme no seu terreo, non estaría ben.

Axuda nas tarefas domésticas?
Nada, nunca o fixen. Na miña época non se compartía o traballo da casa. Hoxe é outra cousa, porque normalmente traballan os dous membros da parella e hai que axudarse mutuamente.

Que tal se lle dan as novas tecnoloxías?
Gústanme, entretéñenme e fago o que podo.

Ten que pedir auxilio ós seus fillos para utilizar o ordenador?
Non. Xa é imposible vivir sen el. Hai que mirar o correo cada mañá porque se non tes 15 pendentes tes 50. Custou traballo adaptarse ó principio, pero houbo que facelo
por necesidade. Ademais, con catro conceptos básicos xa te vas defendendo.