A ''marea de coraxe civil'' a prol do galego segue subindo. Así definiu Antón Reixa, socio fundador de GalegoLab, o movemento en defensa do idioma propio de Galicia ao que vén a sumarse agora esta asociación cultural. A aparición deste colectivo débese á ''alegría e orgullo'' polo galego que sinten os seus integrantes e ao desexo de ''seguir vivindo na nosa lingua'', sinalou Reixa.

GalegoLab é unha iniciativa que se ''separa radicalmente'' da política lingüística da Xunta de Galicia por dúas cuestións, segundo Antón Reixa: ''unha de sexo e outra de afecto porque amamos o galego e disfrutamos del''. Doutra banda, aclara que ''aínda que a Xunta rectificase, GalegoLab seguiría existindo''. Asimesmo, decláranse simpatizantes de tódalas asociacións existentes en defensa do idioma como Quermos Galego, Prolingua ou a Coordinadora de ENDL, ao tempo que se poñen á súa disposición, pero aclaran que as súas accións están especializadas nas culturas emerxentes.

Choiva de ideas
Na páxina web www.galegolab.org pódense atopar as diferentes iniciativas que está a poñer en marcha a asociación. Entre elas distinguen entre ideas e proxectos consolidados, pois as primeiras precisan dun ''proceso de maduración'' para levalas á súa execución final.

Como proxectos xa en marcha destaca 'Galegogym', unha proposta que solicita a achega de creacións musicais para ser distribuídas en cd e podcast polos ximnasios galegos pra facer táboas de fitness ou aerobic escoitando música en galego. '24 horas galego fullscreen' é outra proposta coa que se busca estimular o galego entre xente que non está afeita a usalo, mediante o envío de vídeos de cinco minutos de duración como máximo no que se mostre a conduta lingüística ao longo do día. O mellor vídeo está premiado con 300 euros.

A pesares do pouco tempo de existencia xa existen tamén varias ideas. Destaca o 'máster de aldea', consistente en organizar xornadas entre neofalantes e xente do rural para enriquecer a fala mutuamente e ''liberarse dos prexuízos''.  'Ida e volta' céntrase no plano musical e propón a celebración de dous concertos de grupos galegos en días consecutivos nas cidades da Coruña e Vigo, para promocionar o idioma entre a xente nova de zonas urbanas. Os 'Flashmobs' en cidades de Galicia e lugares de veraneo durante o verán propoñen, como experiencia piloto, unha na Coruña, coa homenaxe pop a Juan Pardo na súa canción 'Falade meniñas, falade galego'. E, dentro do plano musical, tamén se pretende realizar unha sesión de dj's en galego.

Toda esta rede organízase mediante o sistema de crowdsourcing para poñer en contacto ás persoas e coordinar as aportacións que se realicen de medios de todo tipo para levar adiante as accións mencionadas e outras que aspiran a levar adiante no futuro. Entre  outros moitos, algúns socios fundadores de GalegoLab son: Antón Reixa, María Yáñez, Xoán Antón Pérez Lema, Rafael Cuiña, Agustín Fernández Paz, Paco Lodeiro ou Belén Regueira.